رمضان .. مكة والحرم ..

مر أكثر من نصف الشهر واقتربنا من العشر الأواخر
الله يتقبل من الجميع الصيام والقيام وصالح العمل
ويعيننا على العبادة ما تبقى من الشهر
كتبنا الله وإياكم من العتقاء في هذا الشهر الكريم

في خاطري من كم رمضان رسائل للمعتمرات في رمضان
مارح تكون في جودة وتأصيل رسائل جدتي الحبيبة التي وضعتها سابقًا – تحميل
لكن هي ملاحظات بحكم إني ولعدة سنين أصلي التراويح غالبًا في الحرم ولله الحمد – قولوا ما شاء الله D:

الزحمة..

سألتني قبل كم يوم معتمرة صلت بجانبي : الحرم كدا دايمًا زحمة ؟!
رمضان .. يعني دايمًا زحمة .. يعني يا إنك تجي بدري أو حتصلي في مكان ضيق وصغير أو ماتلاقي مكان .. طبعًا دا لاينفي إنك ممكن تجي بدري وبرضو في النهاية يتصلي في مكان صغير
المختصر .. الحرم دايمًا زحمة وكل سنة تزيد الزحمة عن السنة اللي قبلها .. كوني مستعدة :)

هل في أوقات الزحمة تكون فيها أكثر؟ طبعًا لازم
عندك .. ليالي الجمع .. ليلة ٢٧ .. ليلة ٢٩ التختيم .. السنة فجأة ليلة ١٦ كان مررة زحمة الظاهر انتشرت برودكاستات مضى نصف الشهر والناس قررت تتعبد :$

هل في وقت العمرة تكون فيها خفيفة؟
أكيد طبعًا في .. مثلًا  السنة دي كانت بداية العمرة الساعة ٢ بعد منتصف الليل أخف الساعات .. ساعة ونص بالكتييير وانتو مخلصين

المرور بين الصفوف ..

لو جيتي تمري بين الصفوف وقت الصلاة عشان الطريق أقرب أو تدوري مكان تصلي فيه .. الله يسعدك وينور بصيرتك لا تدعسي ع السجادة أو قدام المصليات بالزبط مكان سجودهم أو ع الغطوة اللي قدامهم :/ يعني طفتي وبالشراب وأحيانًا بلل وكدا :| حاولي تحطي رجلك في الحتة اللي بين اتنين او تحت أو فوق مكان السجود :$

مرة لازم تعدي وشفتي وحدة عدت من بين اتنين .. ربي يرضى عليكِ عدي من بين اتنين غيرهم .. راعي شعور الادميتين اللي كل شوية يندفو عشان الناس تمر
هم بيصلو في الطريق طيب ! صح معاكِ بس برضو يعني اهو شوفة عينك الدنيا زحمة

كمان وانتي بتعدي طلي مكان رجولك مو بس عشان السجدة لكن عشان يمكن يكون في مصحف ما انتبهتي له ولا بيبي نايم ولا نظارة وحدة حطتها تحتها :)

صفوف الصلاة..
وما أدراك ما صفوف الحريم .. مع الزحمة تسير الصفوف حكاية حزينة ..
عزيزتي في كل حتة في الحرم في توضيح لاتجاه القبلة .. مرة جميل لو انك عرفتي الاتجاه وخليتي اللي حولك يصلو في صف صحيح ومرتبين :)
تعرفي القبلة إما بإنك تشوفي الكعبة فين أو ببساطة تشوفي الرخام اللي واقفة عليه دحين أتوقع كل اتجاه الرخام باتجاه القبلة .. وفي أماكن تلاقي فيها خطين أزرقين متوازيين يعطوكِ اتجاه القبلة الصح :)

الأطفال ..
دولا شي تاااني .. طيب أقدر إنك تبي تصلي في الحرم وعندك أطفال ما تقدري تحطيهم في مكان .. حاولي تجيبيلهم حاجة تلهيهم عن المضاربات والجري .. وإذا سوو شي غلط لا تضربيهم وتخليهم يبكو ويزعجو اللي بيصلو الله يسعدك :)

الأحذية ..
أكرمكم الله .. جميل يكون معاكِ من البيت كيس عشان تحطيها فيه بدل ما تترمى وما تعرفي كيف تحطيها :)

زمزم ..
دي ملاحظة قديمة أيام ما كنت أصلي فوق ..
زمزميات الزمزم موجودة في كل مكان وفيها مويا ومكان للكاسات النظيفة ومكان للكاسات المستعملة وحوض تحت .. مرة مو حلو انك تصبي بإهمال وتسمحي لنفسك تكبي الموية ع الأرض أو تشربي وتحطي الكاسة في الأرض !! خاصة لو كانت في وحدة بتصلي جمبها !! خلي المكان نظيف ومرتب .. الموية في الأرض ممكن تزحلق ممكن تبلل شراريب الناس اللي جاية تصلي .. في عمال نظافة في الحرم ينظفو الموية صح .. بس مو دايمًا يقدرو يدخلو في صفوف النساء :)

الجوال ..
زي أي مسجد أو تجمع في العالم يفضل إنو يكون صامت :)

الممرات ..
في ممرات في الحرم مرة ممنوع الصلاة فيها .. حلو إنو لما يقلك العسكري أو شاب الكشافة ممنوع تدوري على مكان تاني أو تدخلي على جوا تدوري مكان بين الناس اللي بتصلي بدون جدل كثير يزعج اللي بيصلو جمبكم :)

العباية ..
حاولي تكون عبايتك قماشها خفيف وبارد وطرحتك كذلك .. انتبهي من البوالط اللي برقبة أو ياقة لأنها تحرر بزيادة

الابتسامة واللطف ..
لاحظتي أي حاجة على أي أخت بتصلي حولك حاولي تساعديها بابتسامة حتى لو ما تعرفي لغتها .. شعرها طالع من الطرحة أضحكيلها وأشريلها على شعرك وطرحتك تدخله .. عندها مكان فاضي وتبي تصلي جمبها وتبيها توسع لك شوية ابتسمي واطلبيها حتى لو بالإشارة وحترضى – غالبًا –
كل شي بابتسامة ولطف يسير ويمشي .. بدون عناد ولا عصبية .. كل الموجودين تعبانين وحرانين ومسافرين :)

يمين ..
حاولي لما تمشي في أي ممر زحمة وناس رايحة وناس جاية تاخدي يمينك .. لو كلنا حاولنا ناخد يمين محد راح يصدم في أحد أو يتقفل الطريق :)

خلصتي ..
تقبل الله :)
واللي راجعين من الطريق اللي أمشي منه .. ترى هو موكاتشينو واحد في الطريق .. والناس كتير اللي عطشانة وحرانة ..
لو كنتو ٦ أنفار .. وكلو وحدة بس توقف في الطابور مو كلكم تسوو زحمة
ويا حبذا تكون طلباتكم قليل – مو قصدي لا تشربو .. لكن تراكم راجعين سكنكم!! – يعني مالو داعي تطلبو ٣ ايس شوكولاتة و٢ قهوة و١ ايس فراولة و ٢ مويا وحدة حارة ووحدة باردة !!
اطلبو الشي اللي يوصلكم للبيت بدون ما تعطلو سير الناس :)

وشكرًا :)

وكل عام وانتم بخير ^_^
وعمرة مقبولة ^_^

تعليق واحد to “ رمضان .. مكة والحرم .. ”

  1. السنة دي طلعت حاجة جديدة ساروا يحجزو اللي جايين من خط جدة مكة السريع في الحجز اللي قبل مكة وتروح بالباص لين الحرم.
    انا رحت بعد الفجر على طول من جدة رجعنا البيت على الساعة 11 بيتنا. عند المطار

أترك تعليقا